118 меңнән артык кеше түләүләрне вакытыннан алда алачак
Декабрьгә билгеләнгән балалар түләүләре һәм йөкле хатын-кызларның пособиеләре Татарстанда Яңа ел бәйрәмнәренә кадәр биреләчәк. Бу хакта Россия Пенсия фондының Татарстан Республикасы буенча бүлегенең матбугат хезмәтендә «Татар-информ»га хәбәр иттеләр.
«118 меңнән артык кеше түләүләрне вакытыннан алда алачак. Кредит учреждениеләре аша ярдәм чаралары алучы гражданнарга түләүләр графиктан иртәрәк күчереләчәк», – дип хәбәр иттеләр бүлектә.
Иртәгә, 29 декабрьдә, (график буенча каралганча, 2023 елның 3 гыйнварында түгел) йөклелекнең беренче атналарында исәпкә баскан хатын-кызларга, сигез яшьтән 17 яшькә кадәрге балалар өчен, балаларын яшь ярымга кадәр тәрбияләүче эшләмәүче ата-аналарга, шулай ук чакырылыш буенча хәрби хезмәт үтүчеләрнең балаларына айлык түләүләр киләчәк.
Айлык түләүләрне Россия Почтасы бүлекләре аша алучылар пособиене график буенча – 2023 елның 3-25 гыйнварында алачак.
Дәүләт хезмәтләре порталында балалы гаиләләргә һәм йөкле хатын-кызларга каралган бердәм пособиегә гариза бирү мөмкинлеге барлыкка килүен «Татар-информ» хәбәр иткән иде. Гаризаларны Социаль фонд бүлекчәләрендә 2023 елның 9 гыйнварыннан соң шәхсән тапшырып булачак.
Нет комментариев