Популяр татар блогеры өйләнә

Блогер Олеся Лесная һәм җырчы Лилия Хәйруллина белән уртак вайннар төшерүче популяр татар блогеры Илнар Идрисов сөйгәненә тәкъдим ясаган. Әлеге матур вакыйга Гашыйклар көнендә, күзәтү тәгәрмәче кабинасында үткән.

«Беркайчан да шулай дулкынланганым юк иде. Алдымда мондый чибәр кызы утырганда каушата, әлбәттә. Тормышымда син барлыкка килгәч, бик күп нәрсәләр үзгәрде. Мин идеаль түгел, ләкин мин сиңа һәрвакыт игътибар бирергә, сине көн саен сөендереп торырга вәгъдә бирәм. Минем тагын бер искиткеч тәкъдимем бар. Эльвина Илшатовна, сез миңа кияүгә чыгарга ризамы?» – дип сөйләгән ул. Әлбәттә инде, Илнар сөйгәненнән уңай җавап алган.

«Менә бу – яңалык, ичмасам. Котлыйм сезне», – дип язып калдырган Лилия Хәйруллина пост янында иң беренчеләрдән булып. Илнурның йөргән кызын Лилия Хәйруллина дип уйлаучылар да булган икән. Шуларның берсе Лилиядән: «А-а-а, Илнарның кызы сез түгелмени?» – дип сорап куйган. «Күпләр шулай уйлагандыр. Без бит бергәләп видеолар төшерә идек», – дип көлгән җырчы.

«Котлыйм, бөтен авылыбыз белән көттек», – дип шаярткан Илнарның вайннар буенча тагын бер партнеры – Олеся Лесная.

Калганнар яшьләргә бәхетле тигез тормыш теләгәннәр.

Чыганак: Интертат

Фото: Социаль челтәрләр