Ришат Төхвәтуллин зур югалту кичерә

Ришат Төхвәтуллинның Алия Карачурина бүләк иткән Җанаш исемле эте үлгән. Җанаш истәлегенә җырчы инстаграмда моңсу пост язган.

«Истәлеккә монда калсын әле. Җанашны туган көнгә Алия бүләк иткән иде. Беренче тапкыр кулга тоткач уйлап куйдым, бу бит тере җан иясе һәм мин аның өчен җаваплы.

Үзем белән гастрольләргә алып чыккан булды. Гримеркада эсседән кая керергә белми, көчкә концерт беткәнен көтеп җиткерә иде.

Стәрлетамак шәһәрендә сәхнәгә дә чыккан иде, ияреп. Аннары үзем белән кунакханәгә алып керә идем. Мин йөгереп кергәнче бөтен вип-номерны эт оясына әйләндергән иде. Шуннан аны авылда калдырдым. Авылда аңа нык рәхәт иде. Үскәнче… Аннары авылдагы тавыкларны тота башлагач, бәйләп куйдык. Җизнигә кунакка баргач. тавыгын бер генә капты.

Мин гастрольдән кайтканны көтеп тора иде.

Нәрсәдән үлгәнен беркем дә белми. Өч көн ашамаган, әллә эссе булган, әллә талпан, әллә сагынуыннан. Җанашның нык якын җанга әйләнгәнен әле генә аңладым», — дигән Ришат.

Инстачылар җырчының кайгысын уртаклаша.

Чыганак: Интертат