Илнар ШӘЙХЕТДИНОВ: "Кызлары булган әти бик бәхетле кеше икән ул.."

25 апрельдә – Россиядә кызлар көне. Әлеге бәйрәм гаиләдә кызларыгызга күбрәк игътибар итеп, мәхәббәтегезне тагын бер кат белдерү өчен менә дигән форсат.

Илнар ШӘЙХЕТДИНОВ,Әгерҗе шәһәре: 

– Мин – ике кызлы әти! Амелиябезгә – 8, Камиллабызга 5 яшь. Кызлары булган әти бик бәхетле кеше икән ул. Алар шундый ягымлы, сөйкемле, чибәрләр. Дөньяларын онытып уйнауларын күзәтеп тору шундый рәхәт, күңелле. Кызларның үз уеннары, үз дөньялары. Алар кечкенәдән үк тирә­яктагылар турында кайгырта беләләр. Табигать шулай яралткан, күрәсең. Курчаклы уйнаганда да ризык әзерлиләр, кием тегәләр. Эштән өйгә алар янына ашкынып, сагынып кайтам. Алар каршыма йөгереп килеп, кочаклап каршы алалар.

Үзе кебек матур кызлар бүләк иткән җәмәгатем Азалиягә, безне очраштырган язмышыма мин бик рәхмәтле.

Кызларымның киләчәк язмышлары да бүгенгедәй матур булсын дип телим.