Девятерня авылында Хәтер һәм кайгы көне чарасы узды

Нәкъ менә сугыш башланган иртәнге сәгать дүрттә Девятерня авылындагы илгә җиңү бүләк иткән батырлар хөрмәтенә куелган һәйкәл янында "Батырларның даны мәңгелек" дип аталган искә алу чарасы узды.

Аны мәдәният йорты хезмәткәрләре, китапханәчеләр авылдашлары, туган авылларына кайткан якташлар белән берлектә оештырганнар. Алар сугыш кырларында ятып калган һәм туган якка җиңү алып кайткан бабаларыбызны бер минут тынлык искә алганнар. Һәйкәлгә чәчәкләр салганнар, Хәтер шәмнәре кабызганнар.

Чарада Ижау шәһәреннән кайткан авылдашлары – Россия Хәрби-диңгез флотының запастагы офицеры, 1нче ранг капитаны Рәшит Тимуршин да катнашкан. Аның катнашуы һәм каһарман бабаларыбызга багышлап ясаган чыгышы яшь буын өчен патриотик тәрбия үрнәге булган.