Авылда эшләү – тагын да зуррак җаваплылык

Медицина хезмәткәрләре көне уңаеннан аның мөдире Константин ЗАКИРОВ белән эшчәнлекләре, алда торган бурычлар турында сөйләштек.

ТӨП БУРЫЧ – ПРОФИЛАКТИКА

– Безнең амбулаториянең төп эшчәнлеге авыруларны кисәтүгә, авыру, инвалидлык һәм үлем очракларын киметүгә юнәлдерелгән, – ди Константин Иванович. Әлеге эшчәнлек, иң беренче чиратта, диспансерлаштыруда чагылыш таба. – Диспансерлаштыру халыкның вакытыннан алда үлүенең төп сәбәбе булып торучы йогышлы булмаган хроник авыруларны иртә стадиядә ачыклау мөмкинлеге бирә. Болар, иң беренче чиратта, кан әйләнеше системасы (кан басымы, йөрәкнең ишемик авыруы һ.б.лар), тын алу системасы авырулары, диабет, яман шеш. Тикшерү барышында әлеге авыруларның берәрсе булса да ачыкланган очракта пациент диспансер күзәтүенә алына. Мисалга, безгә беркетелгән 2500 кешенең 960ы диспансер исәбендә тора. Алар елына ике тапкыр медицина тикшеренүе узарга тиеш. Кызганычка каршы, барысы да килмиләр. Без аларга шалтыратабыз, чакырабыз. Кыскасы, бу юнәлештә даими эш алып барабыз, – дип сөйли табиб. – Шулай ук кискен авырулыларны дәвалыйбыз, чакырулар буенча өйләргә йөрибез. Социаль хезмәткәрләр белән берлектә озак вакытка тәгаенләнгән тәрбия системасын тормышка ашырабыз. Бу яклап һәр пациент өчен аерым график төзелгән. Шулай ук санитария-гигиена эшләре алып барабыз, прививкалар ясыйбыз.

Амбулаториядә физиотерапия дәвалану һәм вакцинация, венага инфузия ясау (капельница) өчен тиешле шартлар бар. Лаборатория эшли.

– Авылга мобиль поликлиника килгәч, неврологка күренергә барган идем. Ул физиотерапия дәвалану узарга киңәш бирде. Шуннан үзебезнең амбулаториягә физиокабинетка йөри башладым. Бик ошый: якын да, файдасы да бар, – ди Елена Гарифуллина.

Мобиль поликлиника дигәннән, май аенда ике атна дәвамында эшләгән күчмә поликлиникага көн саен 20–30 кеше йөргән.

Константин Иванович җитәкчелегендә коллективта унбер кеше эшли. Болар – шәфкать туташлары, фельдшерлар, лаборантлар. Узган ел табиб-педиатр кабул ителгән.

– Ольга Кокина туганнан башлап 18 яшькә кадәрге пациентларга медицина ярдәме күрсәтү өчен җаваплы. Бала тапканнан соң патронаж, профилактик чаралар уздыру, прививка кую – барысы да аның кулы аша уза, – ди Константин Иванович.

Амбулаториягә караган торак пунктлардагы фельдшерлык-акушерлык пунктлары медицина хезмәткәрләре белән дә тыгыз элемтә булдырылган.

– Мордывыйда Гөлнара Төхвәтуллина, Сарсак-Омгада Татьяна Никифорова, Яңавылда Физалия Салихова, Тәбәрледә Валентина Уразманова белән бер йодрык булып эшлибез. Фельдшер булмау сәбәпле, 700гә якын кеше яшәүче Көчек авылына атнага бер тапкыр үзем барып йөрим. Варкләд-Бодьяда да әлегә фельдшер юк. Ә менә фельдшер ярдәмчесе Любовь Михайлова үзенә йөкләнгән вазифаларны җиренә җиткереп башкара, – ди ул, һәркайсына рәхмәтле булып.

Алабуга медучилищесын максатчан юллама буенча тәмамлаган Аидә Якутова да коллективта күптән түгел генә эшли.

– Мин электрокардиография кабинетында эшлим. Шәфкать туташы вазифаларын да башкарам. Эшем дә, коллектив та бик ошый, – ди яшь белгеч.

ХЕЗМӘТ ШАРТЛАРЫ ЯХШЫРГАН

Узган ел амбулатория урнашкан бинаны капиталь төзекләндереп, җиһазларны яңартканнан соң хезмәт шартлары тагын да яхшырган.

– Түбә, стеналар, идән-түшәмнәр, ягып җылыту, вентиляция системалары – барысы да яңартылды. Яңа шкафлар, урындыклар, стеллажлар, кушеткалар, картотека, ЭКГ аппараты, принтерлар кайтты, – ди Константин Иванович. – Һәр хезмәткәр структуралаштырылган электрон медицина документы (СЭМД) системасында эшли белә. Санлы медицина безнең эшчәнлегебезгә үтеп керә бара. Әйтик, пациент беренче кабул итүгә амбулаториягә килсә, икенче-өченчеләрен Мәхәббәт аша дистанцион уздыруны гамәлгә кертә барабыз. Бу ерак авыллардан килеп йөрүче пациентлар өчен аеруча уңайлы.

Җыеп әйткәндә, һәр хезмәткәргә эш җитәрлек.

– Авыл җирендә эшләү безгә дә, пациентларга да зуррак җаваплылык өсти дип уйлыйм. Чөнки урамда бик еш күзгә-күз очрашырга туры килә. Кешенең сәламәт булуы без, медицина хезмәткәрләре, өчен генә түгел, аның үзе өчен дә бик мөһим бит. Моны аңлаган хәлдә сәламәтлеге турында кайгыртучы авыл халкына бик тә рәхмәтле без. Һәм үзебезнең яктан аларга ярдәм итәргә һәрчак әзер, – дип йомгаклады әңгәмәне Тирсә амбулаториясе мөдире Константин Закиров.