Әгерҗе мәктәбе укучылары тимер юл ашханәсендә экскурсиядә булдылар

3 нче мәктәпнең 8 “А” сыйныф укучылары тимер юл ашханәсендә мавыктыргыч экскурсиядә булып кайттылар, дип хәбәр итә “3нче мәктәп”. 

Тәҗрибәле пешекчеләр пешерү серләре белән уртаклаштылар һәм балалар өчен чын мастер-класс үткәрделәр. Аның барышында яшь кулинарлар ике популяр ризык: хуш исле чөгендер ашы һәм йомшак кекслар әзерләделәр. 

Оста пешекчеләр җитәкчелегендә балалар камыр болгаттылар, яшелчәләрне турадылар һәм ризыкларны дөрес тәмләтергә өйрәнделәр. Аннан соң үзләре пешергән  ризыкларны горурлана-горурлана авыз иттеләр.

“Үз эшенең осталары булган пешекчеләрнең ничек ризыклар әзерләвен карап тору, өйрәнү бик кызык. Без ризык әзерләү болай мавыктыргыч булыр дип уйламаган идек,” - дип фикерләре белән уртаклаштылар укучылар.

 

Бу очрашу балаларга пешекче һөнәре турында күзаллауларын киңәйтергә һәм яңа күнекмәләр үзләштерергә ярдәм итте.