Әгерҗедә узган Сабантуйның кече сәхнәсе балалар өчен бәйрәм үзәге булды

Әгерҗенең традицион Сабантуй бәйрәме бар халыкны берләштерде. Бу көнне мәйданчыкларда күңел ачу, музыка һәм ярышлар рухы хөкем сөрде. 

Кече сәхнәдә Балалар иҗаты йорты тарафыннан оештырылган концерт программасы оештырылды. 

Тамашачылар район мәдәният йорты каршындагы “Хыял” балалар сәнгать мәктәбе укучылары, шәһәр балалар бакчалары, “Вертикаль” бию студиясе, Ижаудан “Спорт аэробикасы” берләшмәсе укучылары чыгышларын күрделәр. Һәр чыгыш кызыклы һәм иҗади иде. Тамашачылар артистларны көчле алкышларга күмделәр. 

Сабантуй истә калырлык матур чыгышлар һәм күңелле ярышлар белән бергә үрелеп барды. Балалар иҗат йорты педагоглары балалар өчен күп кенә кызыклы сынаулар әзерләделәр. Алар арасында “чүлмәк ват”, “чәч үр”, “күңелле торба чистартучылар” кебек күңелле ярышлар бар иде.

Барлык катнашучыларга да баллы призлар һәм истәлекле бүләкләр тапшырылды. Бу көнне балалар мәйданы балалар шатлану-көлүеннән шау-гөр килеп торды.